काठमाडौं, ९ असोज। लगातारको वर्षासँगै काठमाडौं उपत्यकाका नदी तथा खोलामा पानीको बहाव बढेको छ। मनोहरा खोलामा समेत पानीको सतह बढेपछि खोला आसपासका क्षेत्र जोखिममा परेका छन्।
मनोहरा खोलामा पानीको बहाव बढेसँगै मुलपानी–बोडे जोड्ने पुल आसपासको क्षेत्र प्रभावित भएको छ। पुलसँगै रहेको ग्याबिन जालीको क्षेत्रको जमिन भासिएपछि सम्भावित जोखिमलाई मध्यनजर गर्दै उक्त पुलबाट आवतजावत रोकिएको छ।
अविरल वर्षाका कारण मनोहरा खोलासहित भक्तपुर र काठमाडौंका विभिन्न खोला तथा नदीमा पानीको सतह बढिरहेको छ। स्थानीय प्रशासन तथा सुरक्षा निकायले नदी तथा खोला किनारका क्षेत्रमा निगरानी बढाएका छन्।
भक्तपुरतर्फ मनोहरा र हनुमन्ते खोला आसपास पानीको सतह बढेपछि स्थानीयलाई सतर्क रहन आग्रह गर्दै प्रहरीले विभिन्न क्षेत्रमा माइकिङसमेत गरेको छ। मनोहरा–दिव्यश्वरी प्लानिङ, राधेराधे, बालकोट–सागबारी लगायतका क्षेत्रमा सावधानी अपनाउन आग्रह गरिएको छ।
यता मनोहरा खोलाको बहाव बढ्दै गएपछि ललितपुरको च्यासल क्षेत्रसमेत बाढीको जोखिममा परेको छ। च्यासलस्थित नेकपा एमालेको केन्द्रीय कार्यालय आसपाससम्म पानीको बहाव बढेको विवरण सार्वजनिक भएको छ।
जल तथा मौसमसम्बन्धी निकायले नदी तथा खोलाको अवस्था निरन्तर निगरानी गरिरहेको छ। जल तथा मौसम विज्ञान विभागको बाढी अनुगमन प्रणालीमा नदी तथा खोलाको पानीको तह, चेतावनी तथा जोखिमको अवस्था अद्यावधिक गरिँदै आएको छ।
मुलपानी–बोडे क्षेत्रको पुलसँगैको जमिन भासिएपछि थप क्षति हुन नदिन अहिले आवतजावत रोकिएको हो। जोखिमयुक्त क्षेत्रमा सर्वसाधारणलाई सावधानी अपनाउन र पानीको बहाव बढेको खोला तथा पुल आसपास अनावश्यक रूपमा नजान आग्रह गरिएको छ।
अविरल वर्षा जारी रहेकाले मनोहरा खोला आसपासका क्षेत्रमा थप जोखिम उत्पन्न हुनसक्ने भएकाले स्थानीय बासिन्दालाई सतर्क रहन आग्रह गरिएको छ।