​काठमाडौं, २९ असार ।

नेपाली कांग्रेसका सभापति गगनकुमार थापाको रातोपुलस्थित निवास अगाडि एक शंकास्पद गाडी पार्किङ गरिएको अवस्थामा फेला परेको छ।

​स्थानीयका अनुसार सोमबार बिहान करिब ७ बजेदेखि B AC 9575 नम्बरको गाडी निवासको गेटै अगाडि मोटरसाइकल समेत निस्कन नमिल्ने गरी पार्किङ गरेर छाडिएको हो। अचम्मको कुरा त, उक्त गाडीका चालकले सवारी साधन त्यहीँ छाडेर प्रहरीकै गाडीमा चढेर फर्किएको स्थानीयले दाबी गरेका छन्। यद्यपि, प्रहरीले भने यस विषयमा थप अनुसन्धान भइरहेको जनाएको छ।

​सञ्चार गृहहरूमा पनि उस्तै गतिविधि

कांग्रेस सभापति थापाको निवास अगाडि मात्र नभई सोमबार बिहानैदेखि काठमाडौंका प्रमुख सञ्चार गृहहरू अगाडि पनि यसै गरी शंकास्पद गाडीहरू पार्किङ गरिएका छन्। अनलाइनखबर, हिमालय टीभी र कान्तिपुर पब्लिकेसन्सका कार्यालय अगाडि पनि सवारी आवतजावतमा अवरोध पुग्ने गरी शंकास्पद रूपमा गाडीहरू राखिएको पाइएको छ।

​एकै दिन नेता र सञ्चार माध्यमका कार्यालयहरूलाई लक्षित गरी भएका यी शंकास्पद पार्किङका घटनाहरूलाई प्रहरीले गम्भीरतापूर्वक लिँदै अनुसन्धान अघि बढाएको छ।