लोकप्रिय गायिका इन्दिरा जोशीले सामाजिक सञ्जालमार्फत आफ्नो गर्भावस्थाको नयाँ अनुभव र बेबी बम्प फोटोसुट सार्वजनिक गरेकी छन्। जुम्ल्याहा सन्तानको प्रतीक्षामा रहेकी उनले भावुक स्टाटससहित आकर्षक तस्वीरहरू साझा गरेकी हुन्, जसले उनका प्रशंसकहरूको ध्यान खिचेको छ।

इन्दिराले आफ्नो पोस्टमा गर्भावस्था आफूले कल्पना गरेभन्दा धेरै चुनौतीपूर्ण रहेको अनुभव साझा गरेकी छन्। उनले लेखेकी छन्, “अहिलेसम्म जुम्ल्याहा बच्चासँगको यात्रामा मैले जे अनुभव गरें, त्यसपछि अब म आफूलाई ‘यदि यो गर्न सक्छु भने जे पनि गर्न सक्छु’ भन्ने महसुस गरिरहेकी छु।”

उनले गर्भावस्थाको यात्राले आफूलाई मानसिक र शारीरिक रूपमा अझ बलियो बनाएको उल्लेख गर्दै यस अवधिलाई जीवनकै महत्वपूर्ण सिकाइको समयका रूपमा व्याख्या गरेकी छन्।

साथै, उनले अघिल्ला पुस्ताका महिलाहरूले गर्भावस्थाका कठिनाइबारे धेरै कुरा बाहिर नल्याएको भन्दै अहिलेको पुस्ताले आफ्ना अनुभवहरू खुला रूपमा साझा गर्नुपर्ने आवश्यकता औंल्याएकी छन्। उनका अनुसार यसले अन्य महिलालाई पनि प्रेरणा र आत्मविश्वास दिनेछ।